Yanzu-Yanzu: Sulhu Ya Barke A Arewa Maso Gabas.

"A daina zubar da jini"-Makiyaya sun gargadi ‘yan bindiga bayan karya yarjejeniyar zaman lafiya a arewa maso yamma.

Kulen Allah Cattle Rearers Association of Nigeria (KACRAN) ta yi Allah wadai da kashe-kashen da ake yi a arewacin kasar, tare da yin kira ga ‘yan bindiga da ’yan banga da su daina tashe-tashen hankula.

Khalil Moh’d Bello, shugaban KACRAN na kasa ne ya yi wannan roko a wata sanarwa da ya fitar ranar Alhamis. Ya ce kungiyar ta firgita da “abin kunya, kashe-kashen ‘yan Najeriya da ba su ji ba ba su gani ba, da barnata dukiya da satar dabbobi a fadin yankin.

 

A cewarsa, makiyayan sun zama wadanda ke fama da ramuwar gayya da tilastawa daga kungiyoyin masu laifi wadanda ke neman a biya su kudaden haram ko kuma tilasta musu su mika ‘ya’yansu domin shiga cikin kungiyoyin masu dauke da makamai.

 Ya ce makiyaya da yawa kuma suna fuskantar hare-hare daga mayakan sa kai wadanda suka kasa tunkarar ‘yan bindiga a maboyar dazuzzuka amma a maimakon haka “sun kawo karshen ayyukansu ta hanyar kashe makiyayan da ba su ji ba gani ba”.

 Bello ya kara da cewa a lokuta da dama ana samun asarar rayuka da ba a yi niyya ba a tsakanin ‘yan bindiga da jami’an tsaro na jihar.

 Ya ce a wasu lokuta ana tilasta wa makiyaya su ba da mafaka ga kungiyoyin masu aikata laifuka saboda ba a ba su damar shiga wuraren kiwo lafiya a cikin dazuzzukan. 

 Bello ya yi gargadin cewa al’ummomin makiyaya ne za su fi fuskantar barazana idan kasar ta fuskanci wata barazana daga waje, inda ya ba da misali da yadda suka fuskanci fadan da suka yi da kungiyoyin ‘yan banga da jami’an tsaro a baya.

 Kalamansa: “KACRAN, a kowane irin dalili, ta yi watsi da kuma yin Allah wadai da duk wani aiki na kashe ‘yan Nijeriya da ba su ji ba ba su gani ba, “Muna kira ga ‘yan fashi da makami da su kawo karshen wannan aika-aika, wanda babban laifi ne da ba shi da wani dalili ko hujja.

 Ya kuma soki yadda ake warware yarjejeniyar zaman lafiya a Katsina, Kano da Zamfara, inda ‘yan bindiga suka far wa al’ummomin da a baya suka cimma yarjejeniyar sulhu da su.

Bello ya ce wasu daga cikin al’ummomin musamman a Katsina sun mutunta ka’idojin yarjejeniyar zaman lafiya, amma ‘yan bangar da ke cikin kungiyoyin da ke dauke da makamai sun karya yarjejeniyar tare da kaddamar da hare-hare tare da yin garkuwa da su.